KARUNGUT

KARUNGUT PATAHU LEWU PUJON

Ampun maaf salabih helu

Dengan ketun antang patahu

Salabih dengan Hatalla ngambu

Tuntang Jatha kalang labehu

Karungut pandak je dia panjang

Tingang tatu patahu antang

Batang danum guhung asuh asang

Lewu riak rundung pantun sambang

Patahu antang Damang Erang Tingang

Baun karamat bakibar bandera panjang

Manjaga lewu bara musuh asang

Bapenyang menteng balawung bahandang

Hayak karungut je lampang kesah

Karamat ruap bagana tampayah

Akan kakare je kula tundah

Karamat mangkuburung amai tipah

Pasah karamat paham bagana

Babatunggang due je hasansila

Karamat kanyapuh warna bahenda

Hasapau sirap bisak salaka

Tingang tatu bapenyang menteng

Basukah duha batiruh mendeng

Mahaga lewu Kapuas benteng

Bele lewu batarung leteng

Mahaga lewu je hayak hai

Dengan kuasam je mait sakti

Tingang tatu je due biti

Bapenyang menteng hayak bahanyi

Nanggare ku bitim tingang tatu

Harimaung menteng bukit batu

Mahaga penyang pangirik lingu

Hapa manggetu hinting bunu

Nanggare ku bitim antang baputi

Bapenyang menteng puna bahanyi

Tau matehau tuah rajaki

Akan tingang esum gagenep biti

Saritam metuh jaman maruhum

Bahanyi mandui daha belum

Maimbing Mandau hia gantaum

Kalute mahaga tingang esum

Puna bitim antang pasihai

Balaku kahandak esum uras sampai

Tuah rajaki atun haliai

Halajur belum lingu nalatai

Karamat balai paseban raja

Eka tingang tatu melai bajanda

Atun kea meja salaka

Balapik timpung bamacam warna

Karamat bahalap batungket teras

Saran tiwing batang danum Kapuas

Kanyapuh bahenda marium amas

Ngarambang duha je puna pantas

Ela bitim basule huang

Tingang tatu patahu antang

Katawam biting ku dia saluh sambang

Masih langena yoh itung huang

Baya atun kahandak itung

Balaku belum je lampang tarung

Kilau pahiau nyahu batengkung

Bele belum je leteng tarung

Sampai hetuh helu je tandak timang

Karungut pandak je dia panjang

Balaku dengan patahu antang

Halajur nyarurui je tingang lasang

Tikas tu helu tandak sarita

Inyampai akan je tundah kula

Huang kueh bewei eka bajanda

Harian tinai itah hasupa

Palangka Raya, 27-02-2011

Cipt : Sudarwana S.U.Jaya