" TABE SALAMAT LINGU NALATAI SALAM SUJUD KARENDEM MALEMPANG"
semoga bermanfaat bagi umat hindu kaharingan dimana pun berada

Jumat, 17 Juni 2011

KARUNGUT

KARUNGUT  TINGAK PANGANTEN 

Sahelu bara basarita
Yoh ampun maaf je mina mama
Kakare ketun yoh andi aka
Mikeh riwut rawei ku atun sala

Kalute angat kahandak huang
Nyarita ulun tu due tingang
Naharep mimbing batang sawang
Hajanji belum yoh hentang tulang

Ketun due jadi sama bajanji
Mimbing batang yoh sawang saki
Inyaki mantir tu bapire biti
Hajamban Raja Uju tu basakati

Ketun due mimbing batang sawang
Hajanji belum yoh bambang penyang
Mandahan tarung saritan ketun halajur lampang
Manggatang tarung yoh indang apang

Ketun due mandukan sambang garantung
Balaku belum tu lampang tarung
Kilau pahiau nyahu batengkung
Halajur belum tatau manyambung

Hete atun ranying pandereh bunu
Puna kute asal ah bara helu
Mahapan pelek hantelu uju
Hajamban asin Hatalla ngambu

Inatup dengan uei rantihan tingang
Hajamban kuasan yoh putir santang
Je Hatue mendeng baun batunggang
Manukiu nduan hangkauju ulang

Ketun due jadi inyaki imalas
Dengan Hatalla ilaku ka abas
Pambelum inyarah dia bara tikas
Hambaruan salamat bereng barigas

Banama miar je jalan-jalan
Mimbit batang sawang kaharingan
Namuei batang danum jalayan
Balaku danum nyalung kaharingan

Hete atun untung aseng panjang
Mangat tuah rajaki halajur lampang
Pedoman belum yoh hentang tulang
Je tumun kesah indang sangumang

Kalute kea indum bapam jadi tu has anger ingat
Je hinje atei tiruk pampakat
Bambang penyang ketun hapeteng bulat
Halajur Hatalla umba maberkat

Keleh ketun due belum ma andal sinta
Taharep ulun bakas tabela
Kalute dengan je indu bapa
Salabih dengan Ranying Hatalla

Kalute kea halajur bingat
Dengan kare sahur sambat
Halajur batambah yoh hajat miat
Uras nyarurui hayak imberkat

Ela mahapan kutak tanjaru
Bele manampa Karen hinting bunu
Keleh belum tu tau-tau
Pander marandah kutak balemu

Dia manampeleng ampin pusuk kanyawung
Bara kasibahan laut mangantung
Ela sampai ikau ba atei bingung
Bele belum tu leteng tarung

Ketun due belum keleh tau-tau
Dengan kula jalahan ngawa ngaju
Dengan pahari sambil gantau
Kalute panungkup utus Raja Bunu

Are bewei ampin rintangan
Kare aral tuntang cobaan
Naharep dengan atei mahian
Halajur mingat ajaran kaharingan

Ela mawi kalahi kajama
Dengan kalunen ngaju ngawa
Keleh hapander bajurah bajenta
Tuah rajaki atun babala

Manumun auh kakaren kesah
Talagan sinta dia tau teah
Halajur tau dengan kula tundah
Belum marajaki hayak batuah

Nanding ku tinai je kilau aku
Dia ulih ku manenga taladan suntu
Tarung ku saritangku ngasi tutu
Nyangkelang kula sambil gantau

Tandak timang tikas tuh bewei
Balaku penyang itah hinje simpei
Bara tu hanjewu sampai halemei
Inyimpei akan kampungan atei

Sampai hetuh helu tandak sarita
Akan ketun due harun matuh kabalumam taheta
Ela sampai peteh ku haying mananya
Inyimpei akan bambang pusaka

Kalute kakejau ampin helang
Tu lewun ketun dengan aku pangarang
Amun atei aken sama huang
Maja aku tarung je leteng yoh dia lampang

Riwut balemu tandak pangarang
Bajanda pukung pahewan antang
Nanding ku kilau anak burung tingang

Tu je leteng lembut tarung saritang

 Palangka Raya, 17-02-2011
Sudarwana Sakri

1 komentar:

  1. Best Casino Apps for Real Money & Bitcoin - Dr.MD
    Play all the Best Casino Apps & 구리 출장마사지 Bet on Roulette, Slots & Blackjack 김천 출장안마 right 안산 출장샵 from the 논산 출장안마 comfort of your home with the best bonuses and offers 익산 출장안마 from top

    BalasHapus