KARUNGUT LUNUK RAMBA
Sahelu bara ku basarita
Yoh ampun maaf mina mama
Kakare ketun yoh andi kaka
Mikeh riwut rawei ku atun sala
Kalute aku handak manyarita
Kesah riwayat tuh lunuk ramba
Belum huang petak kasambuyan raja
Batimbuk busung amas parada
Iye te kesah lunuk te huran
Je belum melay petak kasambuyan
Batimbuk busung tuh karangan intan
Tuh hadanum nyalung kaharingan
Kalute kasubur ampin lunuk ramba
Tuh Eda garing bilak hapaka
Mamua bawak intan kamala
Hatangkai jamban bisak salaka
Kalute kasubur ampin batang lunuk
Tuh eda je ramba are hasampuk
Pea dia sanang ku angat itung tiruk
Lunuk bagana mangajan tiruk
Iye te kesah lunuk te huran
Eka panenden burung mangawan
Tau tu mangumpul kula jalahan
Tuah rajaki halajur gitan
Tarung lunuk te kumba-kumbang
Bara hulu masuh ka tumbang
Puna lunuk ramba mamating lamiang
Mamua simpey yoh bambang penyang
Lunuk ramba te hayak gantung
Tahan kanampuh pusuk kanyawung
Je lunuk eka panenden burung
Ku je kurik hai rata hapumpung
Lunuk ije tu pandereh mendeng
Tu manajak saluruh Kapuas benteng
Eka burung metu kumpul tu haleleng
Tu je kawan tingang hapumpung renteng
Badai tarung ah murik masuh
Puna lunuk ramba belum basiwuh
Tahan tambeleng riwut manampuh
Je rahat bua tuh masak lumpuh
Lunuk ramba te hayak hai
Rahat bua masak manjadi
Tu ngarambang pating ringgit batawi
Eka manyimpei tuah rajaki
Puna lunuk ramba mating mahiwei
Mamua penyang bambang karuhei
Tesek burung hanjewu halemei
Mamua bawak penyang kasimpei
Kalute indum bapam jadi tu hasanger ingat
Je hinje atei tiruk pampakat
Bambang penyang ketun hapeteng bulat
Ranying Hatalla halajur mamberkat
Sampai hetuh helu auh tandak timang
Akan kakare pahari nduang
Tuh mandahan sama baumur panjang
Rajaki halajur batarung lampang
Palangka Raya, 27-02-2011
Cipt : Sudarwana S.U.Jaya
Tidak ada komentar:
Posting Komentar